Kategori: Sajak Sunda | Diterbitkan pada: 08-08-2008 |

Sajak Nita Widiati Efsa

1

Saenyana langit geus culika ka diri. Méré warna kulawu

Nyatana bodas, padahal batin kumejot niat susuci

Miceun rereged nu dikirim angin musim brangta

Nepikeun warisan kahariwang ngeunaan cinta

Kembang nu dideukeutan bangbara

Sanajan seungit jeung maduna teu diseuseup

Tapi batinna kabawa lunta. Ngumbara tina regangna

2

Saenyana diri kataji. Ku katigin jeung kanyaah nu nyacas

Hanjakal waktu negeskeun hiji takdir mun diri kebat lumampah

Tina batin anjeun nu mirupa langit. Saenyana anjeun pisan

Kingkilaban tengah poé nu ngababuk jiwa. Kareueus

Kaajrih jadi hiji ungkara nu dianggit dina lagu kasmaran

Waktuna nyawang kembang ngungun. Anjeun

Salin jinis jadi bangbara nu muteran mahkota diri

2006

Dimuat di Majalah Manglé No. 2165 edisi 17-23 April 2008