Kategori: Sajak Sunda | Diterbitkan pada: 02-11-2008 |

Ku Nazaruddin Azhar

: Sarah Brightman

di hiji musieum
leungeun anjeun robah jadi lilin beureum
ngusap peteng nu sumerah
ka cahaya nu nampanan kaguligah

sakabéh sarah sanggeus kapalidkeun angin
ukur tiba ka muara nu saat walunganana
implengan beuki jauh tina lambak pangbagéa
ngahunyud jadi sakadar catetan
ladang nyungsi impian teu kasurahan

ti hiji musieum
maridang deui dalingding puisi tingtrim
sanggeus peuting di luareun ieu sukma
ukur jempling nu geus leungiteun sihirna

2006

Dimuat di Khazanah Pikiran Rakyat, 15 Desember 2007