Kategori: Sosok | Diterbitkan pada: 02-08-2008 |

Panitia ngaranjug barang nyusud tilu pangarang ieu. A. Girang Pamungkas (pangarang “Carita Sabada Runtag), Iwang Noor (pangarang “Calana Jero”),  Ageng Pangéstu (pangarang “Kaburna Tokoh Carita”), jeung Sang Niskala (pangarang “Layung Beureum Kiaragantung), manahoréng jinisna mah éta-éta kénéh. Mimitina panitia bener-bener teu terang. Tapi sabada dikonfirmasi ngaliwatan e-mail (lantaran datana teu lengkep), manahoréng éta opat sandiasma téh bogana LUGIENA DE. Panitia mémang hayang écés nyusud laratan ngaran asli nu jadi pinunjul. Malah geus diniatan, mun aya patandang nu henteu nembrakeun biodatana kalayan écés, mangka hadiahna moal dipasrahkeun lamun diparengkeun meunang. Ieu perkara dijalankeun ku panitia sangkan saémbara ngarang di internét téh bener-bener obyéktip, euweuh naskah anu ditulis ku salahsahiji déwan juri sarta dijadikeun pinunjul. Éta kajadian siga kitu téh apan di darat mah tumiba. Bisi cangcaya, pék tengetan sing gemet buku Kanagan (kumpulan Carpon Pinilih Manglé).

Perkara saurang patandang anu nyangking pinunjul leuwih ti hiji, éta mah teu jadi pasualan. Sabab panitia teu ngawatesan karya-karya ti saban pangarang. Sanajan sakabéh juara diborong ku saurang ogé, ari mémang karyana hadé tur kapilih ku déwan juri mah nya tetep wé sah. Loegiena De anu ngaborong opat pinunjul dina saémbara ngarang Hadiah Sastra Bujangga Maya, tangtu baé eu kudu dipasualkeun. Sabab déwan juri mah teu uningaeun éta karya téh beunang si A atawa si B, kajaba rada ngaraba-raba tina gaya nulis jeung cara mikirna. Déwan juri, basa meunteun carpon, ukur dibéré kode naskah, teu uningaeun kana ngaran-ngaran pangarangna.

Lugiena De téh mahasiswa Pensatrada FPBS UPI Bandung, anu mémang karya-karyana mindeng dimuat di média massa. Ieu pangarang kaitung ngora kénéh umurna, lahir 13 Désémber 1983.***

Maruta Bayu