Kategori: Info | Diterbitkan pada: 02-11-2008 |

Saban taun, LBSS (Lembaga Basa jeung Sastra Sunda) ngalélér hadiah ka para pangarang sajak, carpon, jeung ésai anu tulisanana geus dimuat dina média massa citak. Ari média massana mah bisa média anu husus ngagunakeun basa Sunda, bisa ogé anu ngagunakeun basa Indonésia tapi nyayagikeun rohangan pikeun tulisan basa Sunda. Contona HU. Pikiran Rakyat, dina taun 2006-2007 mah lembar khazanah Pikiran Rakyat téh méré tempat keur sastra Sunda. Tapi taun 2008 mah katingalina geus henteu maliré deui kana sastra Sunda. Malah ayeuna mah Khazanah téh ukur medal dua minggu sakali. Sasarina saminggu sakali, saban poé Saptu.

Dua taun katukang (2006), LBSS ngalélér hadiah sastra keur pangarang anu nulis sapanjang taun 2004-2005. Jadi, sigana mah LBSS ngabiasakeun ngalélérna saban dua taun sakali, tapi dirapélkeun. Demi téknisna, LBSS ngabentuk tim juri pikeun meunteun sajak, carpon, jeung ésai anu dimuat di média massa sapanjang taun anu ditangtukeun. Sakur média massa basa Sunda jeung anu nyayagikeun tulisan maké basa Sunda, boga hak diajén ku LBSS. Lamun LBSS henteu ngajén ka salahsahiji média, tangtu baé perelu dipertanyakeun. Siga basa ngalélér Hadiah Sastra LBSS 2004-2005, réa pisan média massa anu diliwat. Majalah Seni Budaya, Bina Da’wah, Sunda Midang, jsté., kaasup média massa anu tulisan-tulisanna henteu kaajén dina taun 2004-2005. Jadi, lamun euweuh tulisan anu jadi pinunjul tina éta média, can tangtu alatan tulisanna goréng da puguh henteu diajén téa.

Dina ngajén Hadiah Sastra LBSS 2006-2007 mah, Alhamdulillah média massa anu saméméhna henteu dirérét téh antukna milu diajén. Lebah dieu, aya kamajuan dina réngréngan panitiana. Mimitina panitia ngawatesan jumlah karya nu bisa diajukeun ka LBSS. Mun teu salah, Seni Budaya jeung Bina Da’wah ukur kabagéan jatah tujuh naskah. Ku kituna, redaktur ogé otomatis jadi juri awal. Ku cara kitu, milihan karya anu rék diabarkeun ka LBSS tangtu moal obyéktip. Sabab geus manusiawi, redaktur tangtu mentingkeun heula karya sobat-sobatna, atawa bawahanna anu sok narulis sajak, carpon, atawa ésai. Contona di KSM Galura, meureun anu diutamakeun téh karyana Kang Nanang, Kang Édi D. Iskandar, Miftahul Malik, jsté. Jeung moal aya nu nyalahkeun da mémang tulisanna ogfé haradé ieuh.

Ku kituna, mimitina mah redaktur KSM Galura jeung Seni Budaya geus sapuk moal ngirimkeun karya ajéneun lamun jumlahna diwatesan. Hayang dikirimkeun kabéhanana wé, keun tugas juri anu meunteunna. Alhamdulillah, ahirna ditedunan ku panitia. Panitia, ngaliwatan Kang Dian Héndrayana nétélakeun yén karya anu dikirimkeun ka LBSS henteu diwatesan. Geus kitu mah, KSM Galura jeung Seni Budaya ogé ngirimkeun sakur karya-karya anu dimuat sapanjang taun 2006-2007. Mugia baé Hadiah Sastra LBSS taun 2008 mah bisa ngawengku média massa basa Sunda anu medalna di dunya maya saperti Salaka online.com.

Geus kitu mah, der wé déwan juri téh meunteunan karya-karya sapanjang 2006-2007. Cenah mah juri dibagi tilu tim. Aya nu husus meunteun sajak, aya nu meunteun carpon, jeung ésai. Satimna diwengku ku tiluan. Juri carpon diwengku ku Dadan Sutisna, Tatang Sumarsono, jeung cécép Burdansyah. Juri sajak diwengku ku Dian Héndrayana, Wahyu Wibisana, jeung Dédy Windiagiri. Juri ésai diwengku ku Hawé Setiawan, Tédi Muhtadin, jeung Abdulah Mustapa.

Panitia tacan ngumumkeun sacara resmi ngeunaan saha-sahana nu jadi pinunjul. Tapi Galuh-Purba.Com geus boga bocoran ti kantor Redaksi Majalah Cupumanik. Hasilna téh nyaéta:

Pinunjul Sajak Taun 2006

1.       Ngaji Diri, karya Rizal Sabda (dimuat di KSM. Galura/ Minggu III Novémber 2006)

2.       Senén Pasosoré, karya Rosyd E. Abby (dimuat di KSM. Galura/ Minggu IV Juli 2006)

3.       Béja ti Kalakay, Karya Sarabunis Mubarok (Dimuat dina Majalah Manglé No. 2061)

 

Pinunjul Sajak Taun 2007

1.       Sanggeus kapalidkeun Angin, karya Nazaruddin Azhar (Dmuat di Khazanah Pikiran Rakyat, 15 Désémber 2007)

2.       Eunteung Diri, karya Tiwi Sonia (dimuat di Majalah Manglé, No. 2129)

3.       Layung Surup di Cisadaan, Karya Darpan (dimuat di Majalah Cupumanik, édisi Juni 2006)

Pinunjul Carita Pondok Taun 2006

  1. “Ciricit Beurit,” karya Toni Lesmana (Cupumanik/Désémber 2006).
  2. “Londok,” karya Hérmawan Aksan (Manglé No. 2086).
  3. “Wilujeng Angkat,” karya Étti R.S. (Manglé No. 2067).

 

Pinunjul  Carita Pondok Taun 2007

1, “Si Sipus,” karya Déni Ahmad Fajar (Lembar Budaya “Khazanah” Pikiran Rakyat 2007).

2. “Kembang Keretas,” karya Ai Koraliati (Manglé No. 2148).

3.  “Jajap nu Mulang,” karya H. Usép Romli (Manglé No. 2133).

 

Pinunjul Éséy Taun 2006

  1.  “Nasib Roman Sunda Ngepop,” karya Atép Kurnia (Seni Budaya/Désémber 2006).
  2. “Cai Buruk Milu Mijah,” karya Dhipa Galuh Purba (Galura).
  3. “Dalang Dumang,” karya Djasépudin (Manglé).

 

Pinunjul Éséy Taun 2007

  1. “Pamiangan,” karya Iip D. Yahya (Galura).
  2. “Ngawur Kasintu,” karya Ki Édas (Bina Da’wah).
  3. “Pamali jeung Sanget,” karya Cécé Hidayat (Cupumanik/ Désémber 2007).