Kategori: Galery Foto | Diterbitkan pada: 29-07-2008 |

 Méga Citrawati alias “Itik” di basisir Kuta, Bali

Alhamdulillah alo kuring Méga Citrawati alias Itik geus lulus sakola ti SMAN 12 Bandung, kalayan hasilna kaitung nyugemakeun. Itik ngagaéng hayang pakanci ka Bali, ngeusi liburan. Hanjakal tikét kuring di Air Asia henteu bisa dibalik nama. Tapi ari hotél mah bisa dibalik nama tur diundurkeun jadwalna.

Dina kaayaan keur bingung mikiran tikét pesawat, Alhamdulillah alo ti Ujungpandang (Sulawesi Selatan), Alo Wawan, nyanggupan pikeun mangmeulikeun tikét pesawat keur duananeun. Ari kuring mah rada wegah, da keur réa pagawéan. Antukna anu miang maturan Itik téh lanceuk kuring, indungna Itik. Voucher hotél di Matahari Bungalow buru-buru dibalik ngaran, asalna atas nama Nety Martin, diganti jadi Tuti Sunarti. Henteu ribet, jajauheun siga Air Asia anu kalintang mengecewakan. Ku kituna, saha baé nu rék mesen hotél di Bali, kalintang hadéna upama mesen ka Pandawa Lima Tour & Travel. Pelayananna ogé hadé pisan. Nuhun kanggo Nety Martin, anu kersa ngalereskeun balik nama hotél. Nuhun ogé ka Dwik (Ni Made Supadmi Apar, anu jegég gati (cenah mah hartina “jegég gati” téh nyaéta geulis pisan) ti Pandawa Lima Tour & travel, anu kalintang nyugemakeunana méré pelayanan ka lanceuk jeung alo kuring.

Puguh baé ka Alo Wawan ogé kalintang nuhun pisan, anu tos mangmésérkeun tikét pesawat, mangnyéwakeun hotél tilu dinten, sarta ngawaragadan salila di Bali. Mugia sagala kasaéanna dibales ku nu langkung rongkah ku Alloh SWT, amiiin.

 

Méga Citrawati alias “Itik” jeung téh Tunang di Nusa Bua, Bali

 

Méga Citrawati alias “Itik” jeung Alo Wawan di Tanah Lot, Bali

 Méga Citrawati alias “Itik”, Teh Tunang, jeung Alo Wawan di Goa gajah, Bali

Ayeuna Itik sareng Tunang tos di Bandung deui kalayan salamet. InsyaAlloh upami tos rinéh mah abdi ogé asa hoyong neuteup langit basisir Kuta, Bali, mangsa wanci sariak layung. Mugia wé aya yuswa tur aya rejekina.***

DHIPA GALUH PURBA