Kategori: Sajak Sunda | Diterbitkan pada: 03-12-2009 |

Sajak RIZAL SABDA

Montong nyarita ngeunaan logika

Lamun diri can siap nandangan kanyenyerian

Da kapan ari hirup téh lir ibarat sora dulag

Keur wayah pada narabeuh dihaja-haja pada nyararék

Montong ngarasa diri baroga jasa

Sangeunahna kumagungan meunang di kula

Kapan ari hirup mah lain saulas sausap kecap

Sagalana kudu jeung rasa ngarah hirup teu matak

Nandang tunggara

Najan batu-batu gunung kiwari geus jadi pamuntangan

Da angger ari jalan mah moal leupas ti manusa jeung Gustina

Majar keur usum walilat mungguh jurang mah moal aya nu nyampeurkeun

Ka hareupeun panon urang kapan?

Dimuat dina koran Galura Minggu III/Nopémber 2006