Kategori: Sajak Sunda | Diterbitkan pada: 18-05-2009 |
Angin, cai, panonpoé, taneuh
Geus nyaksi gurat-gurat kadeudeuh
Nu salawasna maneuh pageuh
nu keukeuh hamo reureuh
ngancik na puseur galeuh-galeuh
Urang, tiluan, baris ngarakit tingtrim
ngawélah kanyaah
muru curug mungguh ngaguruh
ngagulidag, ngagenclang herang
sono nu teu weléh ngadodoho
mangsa tilu rénghap leyur manjur sakujur lalakon…
Curug Cilember, 24 April 2009
