Kategori: Sajak Sunda | Diterbitkan pada: 03-12-2009 |

Sajak Sarabunis Mubarok

Suku gunung tiporos ka biwir lamping

pataréma jeung méga nu ngarandakah

kasieup layung nu mapag poékna peuting

nu ngalangkang di buruan ésé mata

pawinian pelak cinta, pelakna keclak cimata

Lebah bilik, aya nu gegerendengan

mulas rasa nu raheut kakését hinis

ngaping diri nu ngijih hujan doraka

majar hirup téh ngan dipirig kacapi

ngahariring hawar-hawar ngagentra boéh jeung padung

Ti tas angin ngaranjah lodong kakeueung

nu nangtung téh ngadeukeutan neuteup enteung

kalangkangna ngajirim jadi calacah

ngeteyep mapay alketip, taluy rubuh adug songkol

ngaleungit bareng jeung seungit malati

pipir langit lebah dapuran tetengger

Tukangeun curug nu dikurubun téh sasadu

hahampuraan ka batu nu nyangirah ngalér

cimatana nguyumbang metik cantigi

tuluy ngaharéwos ka tiap haté nu nyaring

“Geura balik dulur, isuk aya samagaha!”

Dimuat dina majalah Manglé No. 2087